निपुण भारत अंतर्गत जिल्हास्तरीय कार्यशाळा संपन्न

निपुण भारत अंतर्गत जिल्हास्तरीय कार्यशाळा संपन्न

 नंदुरबार दि.१९ ( वृत्तसेवा)

निपुण भारत मिशन अंतर्गत मूलभूत साक्षरता व संख्याज्ञान अभियान प्रभावी अंमलबजावणीसाठी भाषा व गणित विषयाच्या घटक संच उपयुक्ततेबाबत जिल्हास्तरीय कार्यशाळा नुकतीच संपन्न झाली. जिल्हा शिक्षण व प्रशिक्षण संस्था नंदुरबार येथे दि.१८ जुलै रोजी भाषा विषयाची व १९ जुलै रोजी गणित विषयाची कार्यशाळा संपन्न झाली. या कार्यशाळेत जिल्ह्यातील ९५ केंद्रातील प्रत्येकी एक भाषा व गणित विषयाचे तज्ञ शिक्षक सहभागी होते. या कार्यशाळेचे उद्घाटन जिल्हा शिक्षण व प्रशिक्षण संस्थेचे प्राचार्य डॉ. जगराम भटकर यांच्या अध्यक्षतेखाली व शिक्षणाधिकारी प्राथमिक सतीश चौधरी तसेच वरिष्ठ अधिव्याख्याता रमेश चौधरी यांच्या उपस्थितीत संपन्न झाले.

मान्यवरांच्या हस्ते शालेय शिक्षण परिसरात वृक्षारोपण करण्यात आले. यावेळी जिल्हा शिक्षण व प्रशिक्षण संस्थेचे प्राचार्य डॉ. जगराम भटकर यांनी विद्यार्थ्यांना शिकवणे यापेक्षा विद्यार्थ्यांचे शिकणे यावर भर देण्याबाबत आवाहन केले. तसेच शिक्षणाधिकारी प्राथमिक  सतीश चौधरी यांनी नंदुरबार जिल्ह्याच्या शैक्षणिक गुणवत्ता वाढीसाठी मूलभूत साक्षरता व संख्याज्ञान अभियान महत्वपूर्ण ठरेल, यासाठी सर्व शिक्षक व क्षेत्रीय अधिकारी यांनी एकत्रित प्रयत्न करून प्रत्येक विद्यार्थ्याच्या क्षमतांमध्ये वृद्धी व्हावी यासाठी नाविन्यपूर्ण कार्य करण्याची गरज स्पष्ट केली.

तसेच या कार्यक्रमाच्या प्रास्ताविकातून वरिष्ठ अधिव्याख्याता रमेश चौधरी यांनी निपुण भारत सरकारची  निपुण मार्गदर्शिका व महाराष्ट्र शासनाच्या शासन निर्णयाच्या अनुषंगाने जिल्ह्याच्या शैक्षणिक गुणवत्ता वाढीसाठी मूलभूत साक्षरता व संख्याज्ञान अभियानाच्या ५० दिवसीय उपक्रमाचे  महत्त्व स्पष्ट केले.

निपुण भारत अंतर्गत जिल्हास्तरीय सुकाणू समिती व जिल्हा प्रकल्प सनियंत्रण कक्ष यांच्या माध्यमातून जिल्हाधिकारी श्रीमती मनीषा खत्री, मुख्य कार्यकारी अधिकारी रघुनाथजी गावडे, सहाय्यक जिल्हाधिकारी तथा प्रकल्प अधिकारी मीनल करणवाल, डॉ. मैनक घोष यांच्या मार्गदर्शनातून सदर कार्यक्रम जिल्ह्यात राबविण्यात येत आहे. सदर दोन दिवशीय कार्यशाळेतून केंद्रस्तरीय सुलभकांना घटक संचातील कृतींची सविस्तर माहिती,विविध साहित्यांच्या उपयोगासह स्पष्ट करण्यात आली.

सदर कार्यक्रम ऑगस्ट ते ऑक्टोबर २०२२ या काळात मूलभूत साक्षरता व संख्याज्ञान कार्यक्रमाचे नियोजनबद्ध कृतींचा संच जिल्ह्यातील सर्व जिल्हा परिषद प्राथमिक शाळा, नगरपालिका प्राथमिक शाळा, शासकीय आश्रम शाळा व अनुदानित आश्रम शाळा अंतर्गत इयत्ता २ री ते ८या वर्गासाठी राबविण्यात येणार आहे.

सदर प्रशिक्षण यशस्वीतेसाठी अधिव्याख्याता सुभाष वसावे यांच्यासह जिल्हास्तरीय सुलभक संदीप पाटील, अनंत सूर्यवंशी, रविकिरण सोनवणे ,विशाल चव्हाण, धीरज खैरनार ,कल्पेश गोसावी, हमीद खाटीक, रोहिणी पाटील, रोहिणी बाविस्कर, चेतना चावडा, सुनंदा भावसार, गीतांजली भोई , जयश्री सानप, जयश्री सैंदाणे, रेखा दुरंगी, सोनल बोरसे यांच्यासह तांत्रिक सहाय्य प्रमोद बागले व गोविंद वाडीले यांनी परिश्रम घेतले.

बच्चुभाऊ कडू यांच्या वाढदिवसानिमित्त वैजाली जि.प.शाळेत शैक्षणिक साहित्य वाटप

बच्चुभाऊ कडू यांच्या वाढदिवसानिमित्त वैजाली जि.प.शाळेत शैक्षणिक साहित्य वाटप

 नंदुरबार दि.५ मा. शालेय शिक्षण राज्यमंत्री ना.ओमप्रकाश बच्चुभाऊ कडू यांच्या ५३ व्या वाढदिवसाचे औचित्य साधून सामाजिक उपक्रम म्हणून प्रहार शिक्षक संघटनेचे जिल्हाध्यक्ष गोपाल गावीत यांनी स्व:खर्चाने शहादा तालुक्यातील जिल्हा परिषद प्राथमिक शाळा वैजाली येथे शालेय विद्यार्थ्यांना वही व पेनचे वाटप करून शैक्षणिक साहित्य वाटपाच्या उपक्रमाची सुरुवात करण्यात आली. शिक्षण हे वाघिणीचे दूध म्हटले जाते; परंतु आर्थिक अडचणीमुळे असंख्य गरजू विद्यार्थ्यांना शिक्षण घेणे शक्य होत नाही.

सध्याची वाढती महागाई पाहता शिक्षणासाठी लागणारे साहित्यही अतिशय महाग झाले आहेत. शिक्षणापासून कोणताही विद्यार्थी वंचित राहू नये यासाठी राज्याध्यक्ष विकास घुगे यांच्या मार्गदर्शनाखाली हे रक्तदान, वृक्षारोपण, रूग्णालयात फळे वाटप अनेक उपक्रम राबिविले आहेत. त्याचाच एक भाग म्हणून या शैक्षणिक साहित्य वाटप कार्यक्रम आयोजित करण्यात आला होता.विद्यार्थ्यांना मिळत असलेल्या आर्थिक मदतीचे चीज करून विद्यार्थ्यांनी आपले उज्ज्वल भविष्य घडवावे. या मुलांना हवे ते शिक्षण घेता यावे यासाठी शक्य तितकी मदत संघटनेकडून करील.

इच्छाशक्ती असेल तर माणूस कोणतेही काम जिद्दीने पूर्ण करू शकतो. शैक्षणिक साहित्य वाटप करण्यात येत आहे. आदिवासी भागात विद्यार्थ्यांना पुस्तक संच व शैक्षणिक साहित्याचे वाटप करण्यात आले. या दुर्गम व आदिवासी भागातील विद्यार्थ्यांना दर्जेदार शिक्षण मिळावे या अनुषंगाने हे शैक्षणिक साहित्य या विद्यार्थ्यांना वाटण्यात आले.

विद्यार्थ्यांना वह्या, पेन, फळे व अल्पोपहाराचे वाटप करण्यात आले. वाढत्या महागाईमुळे सर्वसामान्य कुटूंबातील मुलांचे शिक्षण अवघड झाले आहे. ही गरज लक्षात घेवून त्यांना एक हात मदतीचा हा उपक्रम राबविण्यात येत आहे असेही जिल्हाध्यक्ष गोपाल गावीत यांनी सांगितले. यावेळी शाळेचे मुख्याध्यापक सुदाम पाटील, शाळा व्यवस्थापन समिती सदस्या कविता सोमवंशी,सुरेखा पाटील, शिक्षक भरत पावरा, शिक्षक राजू मोरे उपस्थित होते.

‘मिशन झिरो ड्रॉप आऊट’ची प्रभावीपणे अंमलबजावणी कराजिल्हाधिकारी मनीषा खत्री..

‘मिशन झिरो ड्रॉप आऊट’ची प्रभावीपणे अंमलबजावणी करा

जिल्हाधिकारी मनीषा खत्री

नंदुरबार, दि.५  शाळेत दाखल होण्यास पात्र शाळाबाह्य बालकांचा शोध घेऊन त्यांना शाळेत प्रवेशित करणे तसेच बालकांची शाळेतील गळती शून्यावर आणण्यासाठी ५ जुलै ते २० जुलै २०२२या कालावधीत नंदुरबार जिल्ह्यात ‘मिशन झिरो ड्रॉपआऊट’ मोहिम राबविण्यात येणार आहे. या मोहिमेची प्रभावीपणे अंमलबजावणी करावी असे निर्देश जिल्हाधिकारी मनीषा खत्री यांनी ‍दिले. 'मिशन झिरो ड्रॉप आऊट’ मोहिम राबविण्यासाठी जिल्हाधिकारी कार्यालयात  नुकतीच बैठक संपन्न झाली. बैठकीस  मुख्य कार्यकारी अधिकारी रघुनाथ गावडे, शिक्षणाधिकारी सतीश चौधरी, जिल्हा कार्यक्रम अधिकारी कृष्णा राठोड, जिल्हा शिक्षण व प्रशिक्षण संस्थेचे प्राचार्य जगराम भटकर, आदी उपस्थित होते. श्रीमती मनीषा खत्री म्हणाल्या की,  बालकांना मोफत आणि सक्तीचा शिक्षणाचा अधिकार अधिनियम लागू करण्यात आला आहे. या कायद्यांतर्गत ६ ते १४ वयोगटातील प्रत्येक बालकास शाळेच्या पटावर नोंदविले जाणे, बालकांनी नियमित शाळेत येणे आणि त्याला दर्जेदार शिक्षण मिळणे हा हक्क प्राप्त झाला आहे.

त्यामुळे ५ जुलै ते २०जुलै,२०२३ या कालावधीत ‘मिशन झिरो ड्रॉपआऊट’  मोहिम राबविण्यात येणार आहे. या मोहिमेत शाळेत दाखल होण्यास पात्र शाळाबाह्य बालकांचा शोध घेताना ग्रामपंचायत, नगरपरिषद, जन्म मृत्यू अभिलेख्यामधील नोंदी, कुटुंब सर्वेक्षण, तात्पुरते स्थलांतरित कुटुंबात असणाऱ्या बालकांची माहिती,  शाळाबाह्य, अनियमित बालकांची माहिती घ्यावी. जिल्हातील सर्व खेडी, वस्ती,  वाडी,  गाव,  वार्ड वास्तव्य करणाऱ्या शाळाबाह्य बालकांचे सर्वेक्षण करावे. यासाठी गाव पातळीवर मासिक सभा, ग्रामसभा, शाळा व्यवस्थापन समितीने सभा घ्याव्यात. मिशन झिरो ड्रॉपआऊटची प्रसारमाध्यमातून प्रचार व प्रसिद्धी करावी.

शिक्षणाधिकारी (प्राथमिक, माध्यमिक),  जिल्हा कार्यक्रम अधिकारी (महिला व बालविकास),  बालविकास प्रकल्प अधिकारी (ग्रामीण व नागरी) यांच्याकडून गाव. केंद्र, बीट, विभाग व शाळास्तरानुसार नियोजन करण्यात करावे. महसूल, ग्रामविकास,  नगरविकास, सामाजिक न्याय व विशेष सहाय्य, महिला व बालविकास,  कामगार विभाग, आदिवासी विकास विभाग व स्वंयसेवी संस्थांच्या समन्वयाने ही मोहीम यशस्वी राबवून या अभियानात एकही बालक शाळाबाह्य, स्थलांतरित बालक शिक्षणापासून वंचित राहणार नाही याची दक्षता घ्यावी,असे त्यांनी सांगितले. बैठकीस विविध विभागाचे अधिकारी व कर्मचारी उपस्थित होते.

शेगवे जि.प.शाळेला केंद्र सरकारचा स्वच्छ विद्यालय पुरस्कार

शेगवे जि.प.शाळेला केंद्र सरकारचा स्वच्छ विद्यालय पुरस्कार

नंदुरबार दि.१

( प्रतिनिधी गोपाल गावीत) केंद्र शासनाच्या स्वच्छ भारत अभियान अंतर्गत स्वच्छ विद्यालय पुरस्कार स्पर्धेमध्ये जिल्हयातील जिल्हा परिषद शेगवे शाळेला ग्रामीण जिल्हास्तर स्वच्छ विद्यालय पुरस्कार नवापूर तालुक्यातील जिल्हा परिषद शाळा शेगवे शाळेला सन २००२१-२२ स्वच्छ विद्यालय पुरस्काराने गौरविण्यात आले आहे . जिल्हयातील अनेक शाळांनी आॅनलाईन सर्वेक्षण नोंदणी स्वंयमुल्यमापन पूर्ण करून स्पर्धेत सहभाग घेतला होता. स्वच्छ विद्यालय पुरस्काराची माहिती ऑनलाईन भरण्यात आली होती. त्या आधारावर जिल्हा परिषद नंदुरबार यांच्याकडून क्रॉस वेरिफिकेशन करण्यात आले. त्या क्रॉस व्हेरिफिकेशन मध्ये ज्या शाळांची रेटिंग जास्त होती त्यांची निवड करण्यात आली. जिल्ह्यातून अशा ३४ शाळांची निवड करण्यात आली. पुरस्कारासाठी राज्यातील शहरी व ग्रामीण भागातील शासकीय अनुदानित व खाजगी शाळा पात्र असून जिल्ह्यातील शाळांनी यासाठी नामांकन सादर करण्यात आले होते या स्पर्धेसाठी विविध घटकांमध्ये शाळांना माहिती भरण्यात आली होती. त्यामध्ये जिल्हा परिषद प्राथमिक शाळा शेगवे या शाळेला सब कॅटेगिरी मध्ये पाणी व्यवस्थापन व देखभाल आणि दुरुस्ती, शाळा सुधार, स्वच्छता पद्धतीमध्ये सुधार होण्यासाठी शाळा व विद्यार्थी त्यांना प्रेरणा मिळावी यासाठी शौचालय सुविधा, हात धुण्याची व्यवस्था, पिण्याचे पाणी, कोविड १९ आधारित ५९निकषांवर मुल्यमापन करण्यात आले होते.  या सब कॅटेगिरी मध्ये फाईव्ह स्टार रेंटीग मिळाली आहे व ऑल ओव्हर स्कूल मध्ये शेगवे जिल्हा परिषद शाळेला फाईव्ह स्टार रेटिंग मिळालेली आहे. नंदुरबार जिल्हा कार्यालयात झालेल्या कार्यक्रमात जिल्हा परिषद नंदुरबारचे मुख्य कार्यकारी अधिकारी रघुनाथ गावडे, प्राथमिक शिक्षणाधिकारी सतीश चौधरी तसेच माध्यमिक शिक्षणाधिकारी कदम , उपशिक्षणाधिकारी डाॅ. युनूस पठाण साहेब यांच्या प्रमुख उपस्थितीत पुरस्कार देण्यात आला आहे. पुरस्कार स्वीकारण्यासाठी जिल्हा परिषद शाळेचे मुख्याध्यापक सुनिल नारायण सोनवणे व त्यांचे सहकारी राजू लक्ष्मण गावित उपस्थित होते. दोन्ही शिक्षकांनी लोकसहभागातून खूप मेहनत घेऊन शाळा अतिशय सुंदर स्वच्छ आणि देखणी केली आहे. त्यांनी सांगितले की , पुरस्काराचे श्रेय सरपंच कांतीलाल दादा गावीत, ग्रुप ग्रामपंचायत सदस्य शामसिंग दादा गावीत, सदस्य सुरेखाताई गावीत तसेच शाळा व्यवस्थापन समितीच्या अध्यक्षा हीनुताई गावीत, उपाध्यक्ष आकाश गावीत तसेच वीर आदिवासी एकलव्य संघ नंदुरबार शाखा नवापूर तालुकाध्यक्ष कैलास गावीत, उपाध्यक्ष निखिल गावीत तसेच पालकवर्ग यांना द्यावे लागेल. असेही मत मुख्याध्यापक सुनिल सोनवणे यांनी सांगितले.

जिल्हा परिषद प्राथमिक शाळा वैजाली ता.शहादा...नवागतांचे स्वागत,प्रवेशोत्सव संपन्न

15/6/2022...जिल्हा परिषद प्राथमिक शाळा वैजाली ता.शहादा

💐📚शाळा प्रवेशोत्सव व नवागतांचे स्वागत मोठ्या जल्लोषात करण्यात आले... यावेळी गावाचे उपसरपंच विनोद पाटील, शाळा व्यवस्थापन समिती अध्यक्ष प्रवीण पाटील शाळेचे मुख्याध्यापक सुदाम पाटील शाळेतील सर्व शिक्षक वृंद. अंगणवाडी सेविका मदतनीस उपस्थित विद्यार्थी, पालक..

श्री काकासाहेब विद्यामंदिर येथे नवागत विद्यार्थ्यांच्या स्वागतासाठी शिक्षणाधिकारी झालेत शैक्षणिक रथाचे सारथी

श्री काकासाहेब विद्यामंदिर येथे नवागत विद्यार्थ्यांच्या स्वागतासाठी शिक्षणाधिकारी झालेत शैक्षणिक रथाचे सारथी

नंदुरबार दि.१५ गेल्या दोन वर्षापासून कोरोना महामारी मुळे बंद असलेल्या शाळा आज उन्हाळी सुट्टीनंतर सुरू होत आहेत. शासनाच्या आदेशानुसार पहिल्या दिवशी सर्वच नवागत विद्यार्थ्यांचे शाळेत वाजत-गाजत मिरवणूक काढत गुलाबपुष्प देऊन  स्वागत होत असताना श्री काकासाहेब प्राथमिक विद्यामंदिर येथे शाळेच्या पहिल्या दिवशी आकर्षक घोडागाडी रथ व शाळेची बस सजवत विद्यार्थ्यांना बसवून ढोल-ताशांच्या गजरात वाजत-गाजत प्रवेशद्वारापर्यंत आणून गुलाब पुष्प देत मोठ्या आनंदी व उत्साही वातावरणात विद्यार्थ्यांचे स्वागत करण्यात आले व या शैक्षणिक रथाचे सारथी होण्याची संधी मला मिळाली

ही माझ्यासाठी आनंदाची बाब आहे असे मत हिरा प्रतिष्ठान संचलित श्री काकासाहेब हिरालाल मगनलाल चौधरी प्राथमिक विद्यामंदिर व संस्कृती शिशु विहार यांच्या संयुक्त विद्यमाने आयोजित नवागतांचे स्वागत व प्रवेशोत्सव समारंभप्रसंगी नंदुरबार जिल्ह्याचे प्राथमिक विभागाचे शिक्षणाधिकारी श्री सतीश चौधरी यांनी आपल्या भाषणातून व्यक्त केले. पुढे ते म्हणाले शाळेने पहिल्या दिवशी केलेले विद्यार्थ्यांचे स्वागत हे विद्यार्थ्यांसाठी अविस्मरणीय असे आहे असेच नवनवीन उपक्रम राबवून विद्यार्थ्यांमध्ये शाळेची गोडी व आवड उत्साह निर्माण होईल यासाठी व विद्यार्थ्यांच्या गुणवत्ता वाढीसाठी प्रयत्नशील राहावे अशी सदिच्छा व्यक्त केली व विद्यार्थ्यांच्या पुढील वाटचालीसाठी त्यांनी शुभेच्छा दिल्या. कार्यक्रमासाठी प्रमुख मान्यवर म्हणून उपस्थित संस्थेच्या संचालिका सौ.अनिता शिरीष चौधरी यांनी आपल्या भाषणातून नवीन प्रवेशित विद्यार्थ्यांचे स्वागत करत पुढील शैक्षणिक वाटचालीसाठी शुभेच्छा दिल्या. संस्थेचे सचिव तथा शाळेचे मुख्याध्यापक श्री रुपेश चौधरी यांनी प्रास्ताविक सादर करत संस्थेच्या तसेच शाळेच्या माध्यमातून कोरोना काळात चालवलेले उपक्रम तसेच विद्यार्थ्यांच्या शैक्षणिक विकासासाठी शिक्षकांनी केलेले प्रयत्न व पुढील शैक्षणिक वर्षातील धोरण यांचा लेखाजोखा सादर करत शाळेच्या व संस्थेच्या शैक्षणिक कार्याचा गौरव केला व  विद्यार्थ्यांना नवीन शैक्षणिक वर्षाच्या शुभेच्छा दिल्या.

प्रवेशोत्सव समारंभात विद्यार्थ्यांना सजवलेल्या घोडाच्या रथातुन व शाळेच्या बसमध्ये बसवून प्रवेशद्वारापर्यंत वाजत-गाजत  आणण्यात आले तेथे मान्यवरांचे व विद्यार्थ्यांचे औक्षण करून गुलाब पुष्प देऊन स्वागत झाले.शाळेचा पहिला दिवस मान्यवरांच्या शुभहस्ते विद्यार्थ्यांना मोफत पाठ्यपुस्तकांचे व शालेय दप्तरांचे वाटप करण्यात आले. त्यानंतर मान्यवरांनी व विद्यार्थ्यांनी केक कापून शाळेचा पहिला दिवस मोठ्या आनंदात साजरा केला व सर्व विद्यार्थ्यांचे तोंड गोड व्हावे म्हणून केक वाटप करण्यात आला. कार्यक्रमासाठी मोठ्या संख्येने विद्यार्थी व पालक उपस्थित होते.

कार्यक्रमाचे सूत्रसंचालन श्री सतीश काटके व आभार प्रदर्शन श्रीमती नयना सोनवणे यांनी केले तर कार्यक्रमाच्या यशस्वितेसाठी श्री युवराज भामरे, श्री विशाल चौधरी, शेखर पाटील, रवी चौधरी, सुधाकर ठाकूर,चेतन वसईकर आदींनी सहकार्य केले.

वरिष्ठ वेतन श्रेणी व निवड श्रेणी ऑनलाईन प्रशिक्षण २०२१-२०२२वरीष्ठ वेतन श्रेणी व निवड श्रेणी प्रशिक्षण अपडेट.

वरिष्ठ वेतन श्रेणी व निवड श्रेणी ऑनलाईन प्रशिक्षण २०२१-२०२२वरीष्ठ वेतन श्रेणी व निवड श्रेणी प्रशिक्षण अपडेट.

वरीष्ठ वेतन श्रेणी व निवड श्रेणी प्रशिक्षण अपडेट

 

शैक्षणिक संशोधन व प्रशिक्षण परिषद, महाराष्ट्र, पुणे व इन्फोसिस स्प्रिंगबोर्ड यांच्या समन्वयाने महाराष्ट्रातील शिक्षकांसाठी वरिष्ठ वेतन श्रेणी व निवड श्रेणी ऑनलाईन प्रशिक्षण कोर्स चे विकसन करण्यात येऊन सदर कोर्स इन्फोसिस स्प्रिंगबोर्ड प्रणालीवर प्रशिक्षणासाठी उपलब्ध करून देण्यात आले आहेत.

दि. ०२ जुन २०२२ रोजी इन्फोसिस स्प्रिंगबोर्ड प्रणालीवर क्लाउड सेवांचे अद्यावतीकरण करत असताना सदर प्रणाली वापरण्यात वापरकर्त्यांना तांत्रिक अडचणी निर्माण झाल्या होत्या.

आकस्मिक उद्भवलेल्या तांत्रिक अडचणींमुळे पूर्ण जगभरातील वापरकर्त्यांसाठी सदर प्रणाली पुढील दोन ते तीन दिवस बंद ठेवून अधिक अद्ययावत स्वरूपात ती उपलब्ध करून देण्यात येत आहे.

यामुळे वरिष्ठ वेतन श्रेणी व निवड श्रेणी प्रशिक्षणार्थी यांना सदर प्रशिक्षण पूर्ण करण्यासाठी पुरेसा अवधी वाढवून दिला जाईल आणि इन्फोसिस स्प्रिंगबोर्डची सेवा नव्याने सुरू झाल्यावर ईमेलद्वारे कळविण्यात येईल.

सदर प्रशिक्षणाचे सर्व अपडेट व पुढील सूचना आपणास वेळोवळी https://training.scertmaha.ac.in या संकेतस्थळावर उपलब्ध होतील.

आकस्मिक उद्भवलेल्या तांत्रिक अडचणींमुळे प्रशिक्षणार्थी यांना झालेल्या त्रासाबद्दल आम्ही दिलगीर आहोत.

सौजन्य :-

इन्फोसिस स्प्रिंगबोर्ड व

राज्य शैक्षणिक संशोधन व प्रशिक्षण परिषद, महाराष्ट्र, पुणे